CAMP ALEJO SANTOS, Bulacan — Sa pinaigting na kampanya kontra ilegal na droga, isang matagumpay na buy-bust operation ang isinagawa ng pinagsanib na pwersa ng Philippine Drug Enforcement Agency (PDEA) Special Enforcement Service (SES), PDEA Regional Office III, San Jose del Monte City Police Station, at Norzagaray Municipal Police Station noong Huwebes ng hapon (Mayo 15) sa Payogi Leisure Hub, Old Barrio Road, Brgy. Minuyan, Norzagaray, Bulacan, na nagresulta sa pagkakaaresto ng tatlong High-Value Targets (HVTs).
Sa ulat na isinumite kay Col. Franklin P. Estoro, Officer-in-Charge ng Bulacan Police Provincial Office, kinilala ang mga naarestong suspek na sina alias Jessie, 44 anyos, construction worker mula sa Cavite; alias Tina, 36 anyos, residente ng Quezon City; at alias Jess, 21 anyos, mula rin sa Cavite. Habang isang alyas “Tongo,” isang Chinese national, ay nananatiling at-large.
Narekober sa operasyon ang tinatayang 30 kilo ng hinihinalang shabu na may standard drug price na humigit-kumulang P204,000,000.
Kabilang sa mga nakumpiskang ebidensya ay dalawang vacuum-sealed plastic bags na may lamang humigit-kumulang 2 kilo ng hinihinalang shabu (bilang subject ng buy-bust), at 28 vacuum-sealed plastic bags na may humigit-kumulang 28 kilo ng hinihinalang shabu, Nakuha rin ang marked money na P1,000.00, isang cellphone, mga identification cards (kabilang ang passport at lisensya), isang itim na Toyota Fortuner (plate number NBV 6967), susi ng sasakyan, at dalawang pitaka.
Ang matagumpay na operasyong ito ay nagpapakita ng matatag at tuluy-tuloy na kampanya ng Bulacan PNP, katuwang ang iba’t ibang ahensya, upang labanan ang paglaganap ng ilegal na droga at panatilihing ligtas ang mga mamamayan ng lalawigan. (UnliNews Online)
