LUNGSOD NG MALOLOS, Bulacan — Apat na miyembro ng isang pamilya ang namatay habang isa pa ang sugatan nang nang masunog ang kanilang tinitirahang bahay noong Miyerkules ng madaling araw sa Brgy. Bulihan ng nasabing lungsod.
Base sa ulat ng pulisya, kinilala ang mag-asawang nasawi na sina Philip, 49; Maricel, 48; at dalawa nilang anak na sina Felice,18; at Julienne,10 na may apelyidong Calauag habang nasugatan ang anak nilang si ‘Seth’,15, kapwa mga residente ng Alido Heights, Brgy. Bulihan, Lungosd ng Malolos.
Ayon kay ret Col. Manuel Lukban Jr., Bulacan disaster officer, naganap ang insidente bandang alas-3:41 ng madaling araw nitong Mayo 21 sa nabanggit na barangay.
Mahimbing umanong natutulog ang mag-anak nang biglang sumiklab ang apoy at hindi nakalabas sa kanilang bahay.
Ayon sa report, bandang alas-4:18 ng madaling araw nang maapula ng mga rumespondeng tauhan ng Malolos Fire station ang sunog at tumambad ang bangkay ng apat na biktima.Habang ang isa nilang anak na 15-anyos ang nasugatan.
Patuloy na inaalam ng mga otoridad ang dahilan ng sunog. (UnliNews Online)
