LUNGSOD NG MALOLOS, Bulacan — Aabot sa halagang P680K ng shabu ang nasabat sa isang High-Value Individual (HIV) at kasama nito sa anti-illegal drug operation na isinagawa ng Station Drug Enforcement Unit ng Malolos City Police Station sa Brgy. Panasahan, Lungsod ng Malolos.
Base sa ulat ni P/Lt. Col. Rommel E. Geneblazo, Malolos City chief of police, ang operasyon ay isinagawa bandang alas-1:50 ng madaling araw noong Biyernes na nagresulta sa pagkakaaresto ng dalawang suspek na kinilalang sina alias “Joy,” 47-anyos, isang kusinero, residente ng Brgy. Hulo, Obando, Bulacan, na kabilang sa talaan ng High-Value Individuals, at alias “Mar,” 24-anyos, residente ng Brgy. Lawa, Obando, Bulacan.
Nasamsam mula sa mga suspek ang 10 plastic sachet na naglalaman ng hinihinalang shabu na may tinatayang kabuuang bigat na 100 gramo at halagang Php 680,000.00 batay sa Standard Drug Price (SDP).
Ang mga naarestong suspek at ang nakumpiskang ebidensya ay isinailalim sa pagsusuri ng Bulacan Provincial Forensic Unit, habang inihahanda ang kaukulang kaso para sa paglabag sa Seksyon 5 at 11 ng R.A. 9165 (Comprehensive Dangerous Drugs Act of 2002) na isasampa sa Tanggapan ng Panlalawigang Piskal.
Pinuri ni P/Col. angel L. Garcillano, acting Bulacan Provincial Director, ang mabilis na aksyon ng Malolos CPS sa matagumpay na operasyon laban sa ilegal na droga at muling tiniyak ang paninindigan ng PNP Bulacan na tapusin ang banta nito sa pamamagitan ng masigasig at intelihenteng operasyon. (UnliNews Online)
