MANILA — Pormal nang inirekomenda sa Office of the Ombudsman ng Department of Public Works and Highways (DPWH) at Commission on Audit (COA) ang pagsampa ng limang kasong kriminal laban sa mga contractors na sangkot sa mga maanumalyang flood-control projects sa Lalawigan ng Bulacan ngayong Lunes (Sept. 8).
Bilang pagsunod sa utos ni Pangulong Ferdinand R. Marcos Jr. na agarang panagutin ang mga indibidwal na sangkot sa malawakang korapsyon at sabwatan sa flood-control projects, pinangunahan ni DPWH Secretary Vince Dizon at Commission on Audit (COA) Chairperson Gamaliel Cordoba ang Joint Referral ng listahan ng mga natuklasang contractor na mayroong ghost at substandard projects batay sa isinagawang fraud audit.
Isinangguni sa Ombudsman ng DPWH at COA ang pagsampa ng kasong kriminal sa mga sumusunod na contractors: St. Timothy Construction na may dalawang proyekto, Wawao Builders na may dalawang proyekto, at SYMS Construction Trading na may isang proyekto.
“Umpisa pa lamang ito ng ating gagawing pagsasaayos ng ahensya. Sisiguraduhin nating bawat sangkot ay mananagot, at makukulong. Kasunod nito, isasangguni rin namin sa Office of the Ombudsman ang pagsampa ng kasong kriminal laban sa mga napatunayang tiwali sa DPWH,” giiit ni Secretary Dizon.
Sa huli, naniniwala pa rin si Secretary Dizon na majority ng mga nagtatrabaho sa DPWH ay matitino, masisipag at honest ngunit kailangan mawala lahat ng masasamang tao para makapag move-on.
“Hindi makakamove-on ang DPWH kung hindi natin mapupurge itong institusyon na ito at ng masasamang tao. At ‘yon ang commitment ko kay Pangulo at sa ating mga kababayan. Hindi tayo titigil, hangga’t magawa natin,” dagdag pa ni Secretary Dizon. (UnliNews Online)
Soure: DPWH
