CAMP ALEJO S. SANTOS, Bulacan — Naaresto ng mga operatiba ng Bulacan PPO ang 14 na indibidwal na sangkot sa iligal na droga sa magkakahiwalay na operasyon kontra-droga noong Marso 3 at 4, 2026, bilang bahagi ng pinaigting na kampanya laban sa ilegal na droga sa lalawigan ng Bulacan.
Ayon sa ulat ni Major Mark Anthony L. San Pedro, Balagtas chief of police, arestado ang isang indibidwal sa isinagawang anti-illegal drug operation ng mga operatiba ng Balagtas PNP dakong 1:30 ng madaling araw ng Marso 4, 2026 sa Brgy. Borol 1st, Balagtas, Bulacan.
Kinilala ang suspek na si alyas Shaws, 55 anyos, residente ng Brgy. Borol 1st, Balagtas, Bulacan. Nakumpiska mula sa suspek ang tinatayang humigit-kumulang 5 gramo ng hinihinalang shabu na may tinatayang halaga na P34,000.00.
Kasabay nito, batay sa ulat ng mga Hepe ng Pulisya ng Meycauayan, Baliwag, at SJDM CPS, Marilao, San Miguel, at Norzagaray MPS, magkahiwalay na drug-bust operations na isinagawa ng kani-kanilang Station Drug Enforcement Units na nagresulta sa pagkakaaresto ng 13 drug pushers at pagkakasamsam ng hinihinalang shabu na may tinatayang bigat na 11.53 gramo at may halagang P78,404.00, kasama ang buy-bust money.
Ang mga naarestong suspek at nakumpiskang ebidensiya ay dinala sa Bulacan Forensic Unit para sa kaukulang pagsusuri, habang inihahanda na ang mga kasong paglabag sa Republic Act 9165 (Comprehensive Dangerous Drugs Act of 2002) na isasampa laban sa kanila. (UnliNews Online)
