CAMP ALEJO SANTOS, Bulacan — Nadakip ng pinagsanib na puwersa ng kapulisan ang isang lalaki na nakalista bilang Most Wanted Person (City Level) sa Lungsod ng San Jose del Monte kaugnay ng kasong rape, matapos ang matagumpay na operasyon noong Friday (March 16).
Batay sa ulat Ni P/Lt. Col. Reyson M. Bagain, Hepe ng SJDM CPS, naaresto ng mga operatiba ng Warrant Section ng San Jose del Monte City Police Station katuwang ang 301st Maneuver Company, RMFB 3 ang akusado na isang 34 anyos na lalaki, bandang 1:58 ng hapon sa Tierra Benita Subdivision, Brgy. Muzon South, City of San Jose del Monte, Bulacan.
Ang pag-aresto ay isinagawa sa bisa ng Warrant of Arrest para sa kasong Rape sa ilalim ng Article 266-A, Paragraph 1(a) ng Revised Penal Code na inamyendahan ng RA 8353 at RA 11648, na inilabas ni Hon. Cecilyn E. Burgos-Villavert, Presiding Judge ng Regional Trial Court Branch 89, Quezon City, na may petsang Marso 10, 2026 at may rekomendasyong No Bail.
Matapos ang pag-aresto, dinala ang akusado sa San Jose del Monte City Police Station para sa pansamantalang kustodiya at dokumentasyon bago ibalik sa hukuman na naglabas ng nasabing warrant.
Ang matagumpay na pagkakaaresto sa mga most wanted na personalidad ay patunay ng ating patuloy na pagsisikap na mapanatili ang kaayusan at maibigay ang hustisya sa mga biktima ng krimen. Patuloy naming hinihikayat ang publiko na makipagtulungan sa kapulisan sa pagbibigay ng impormasyon laban sa mga lumalabag sa batas. (UnliNews Online)
