STA. MARIA, Bulacan — Wala nang buhay ng damputin ang isang tatlong gulang na batang babae habang sugatan ang kanyang mga magulang sa nangyaring banggaan ng dalawang motorsiklo sa Brgy. Sta. Clara, sa nabanggit na bayan Linggo ng madaling araw. (March 10).
Sa ulat ng pulisya, kinilala ang nasawi na si Margaux Alyson Verana, habang ang kanyang mga magulang na nagtamo ng mga sugat sa iba’t ibang parte ng katawan na sina Ronrick Verana at ang kanyang live-in partner na si Lalaine Llabore.
Base sa inisyal na imbestigasyon, aksidenteng nabangga ng isang berdeng Euro Viperman 150 na motorsiklo na minamaneho ni Ephraim Mungcal ang motorsiklo ng mga biktima na isang Honda Click 125 na may plakang 328CPW, dakong 12:17 ng madaling araw.
Nangyari ang aksidente sa Crossing malapit sa Waltermart sa Barangay Santa Clara, Santa Maria Bulacan.
Isinugod sa Rogaciano M. Mercado Memorial Hospital sa nasabing bayan ang mag-anak ngunit kalaunan ay binawian ng buhay ang bata.
Ang driver ng nakabanggang motorsiklo ay pansamantalang nasa kustodiya ng Sta. Maria MPS at nahaharap sa mga kaso ng reckless imprudence resulting in homicide, physical injuries at damage to properties. (UnliNews Online)
