LUNGSOD NG MALOLOS, Bulacan — Muli na namang nagsagawa ang Malolos PNP Station Drug Enforcement Unit (SDEU) ng buy bust operation at nasakote ang dalawa kataong hinihinalang nagbebenta ng shabu sa Barangay Catmon, sa nabanggit na lungsod noong Miyerkules (June 25).
Ayon sa ulat kay Col. Franklin P. Estoro, Officer-in-Charge ng Bulacan PPO, ni Lt. Col. Rommel E. Geneblazo, Malolos City chief of police, narekober mula sa dalawang suspek ang 10 piraso ng plastic sachet na hinihinalang shabu na tumitimbang na humigit-kumulang 3.7 grams at may Standard Drug Price (SDP) na P25,160 at ang marked money na ginamit sa operasyon.
Inihahanda naman ng mga otoridad ang kasong paglabag sa RA 9165 o Comprehensive Dangerous Drugs Act of 2002 laban sa mga naarestong suspek.
“Ang Malolos PNP ay patuloy na nananawagan sa publiko na makipagtulungan sa pamamagitan ng pagbibigay ng impormasyon upang masugpo ang ilegal na droga sa ating komunidad,” ani Lt. Col. Geneblazo. (UnliNews Online)
