LUNGSOD NG MALOLOS, Bulacan — Inilunsad ang JBM Patrol System (Joint Police, Barangay Peacekeeping Action Teams, Mobilization toward Crime Prevention and Detection in Central Luzon) bilang bahagi ng pagpapalakas ng seguridad at kampanya laban sa krimen sa mga komunidad sa Bulacan.
Layunin ng JBM Patrol System na mapalakas ang ugnayan at koordinasyon ng pulisya at mga barangay, mapataas ang police visibility, at maging mas mabilis ang pagtugon sa mga krimen at iba pang insidenteng maaaring makaapekto sa kaligtasan ng publiko.
Sa ilalim ng programa, paiigtingin ang regular na pagpapatrolya ng mga pulis at Barangay Peacekeeping Action Teams (BPATs), lalo na sa mga lugar na itinuturing na vulnerable sa krimen. Inaasahan ding magiging mas mabilis ang pagbabahagi ng impormasyon tungkol sa mga kahina-hinalang aktibidad at posibleng banta sa seguridad.
Bahagi rin ng layunin ng JBM ang pag-iwas sa krimen bago pa ito mangyari sa pamamagitan ng mas aktibong pagbabantay at pakikipag-ugnayan sa mga residente at barangay officials.
Mahalaga rito ang pakikiisa ng komunidad. Hinihikayat ang mga residente na manatiling mapagmatyag at agad ipagbigay-alam sa mga awtoridad ang anumang kahina-hinalang kilos o insidente sa kanilang lugar.
Sa pamamagitan ng sama-samang pagkilos ng PNP, BPATs, barangay at mga residente, inaasahang magiging mas maagap at organisado ang pagpapatupad ng mga hakbang para sa crime prevention at detection.
Inaasahang magsisilbi ang JBM Patrol System bilang dagdag na mekanismo sa pagpapanatili ng ligtas, mapayapa at maayos na mga komunidad sa buong Central Luzon.
Ang naturang paglulunsad ay isinagawa sa pamumuno ni P/Brig. Gen. Jess B. Mendez, Regional Director, Police Regional Office 3, na kinatawan ni P/Col. Angel L. Garcillano, Deputy Regional Director for Operations, na siyang nagbigay ng mensahe ng Regional Director. Ang kaganapan ay dinaluhan din Malolos City Mayor Christian D. Natividad, James Santos, Executive Assistant bilang kinatawan ni Gov. Daniel R. Fernando, Justine Bartolome, kinatawan ni Vice Gov. Alex Castro at Board Members Michael Aquino at Arturo S.J. Angeles.
Ang programa ay nagsimula sa isang panawagan na pinangunahan ni Rev. Msgr. Pablo S. Legaspi, Kura Paroko ng Espiritu Santo, na susundan ng isang pangkalahatang-ideya ng Sistema ng Pagpapatrolya ng JBM na iniharap ni P/Col. Robert L. Petate, head ng RCADD, PRO 3. (UnliNews Online)
