LUNGSOD NG MALOLOS — “Ito pong pamana ni FPJ, ito po ay dadalhin ko hanggang sa paglilingkod-bayan, sa aking paglilingkod sa aking mga kababayan sa Bulacan.”
Ito ang taos-pusong pahayag ni Gobernador Daniel R. Fernando ng Bulacan matapos siyang parangalan ng prestihiyosong FPJ Memorial Award for Excellence sa ika-74 Taunang Gabi ng Parangal ng Filipino Academy of Movie Arts and Sciences (FAMAS) noong Oktubre 27, 2026, sa Fiesta Pavilion ng The Manila Hotel, Rizal Park, Ermita, Lungsod ng Maynila.
Sa kanyang talumpati sa pagtanggap ng parangal, nagpahayag ng pasasalamat si Fernando sa organisasyon ng FAMAS para sa pagkilala, at inamin na hindi na niya inaasahan na makatatanggap ng mga parangal sa pag-arte matapos niyang ilaan ang halos lahat ng kanyang oras sa serbisyo publiko, na nag-iwan sa kanya ng mas kaunting pagkakataon na ituloy ang mga proyekto sa pelikula at telebisyon.
Inialay ni Fernando ang parangal sa mga Bulakenyo, sa kanyang pamilya, at sa lahat ng patuloy na nagtitiwala at sumusuporta sa kanya sa kanyang paglalakbay bilang isang lingkod-bayan.
Sa paggunita sa kanyang karanasan sa paggawa ng pelikulang “Ang Pagbabalik ng Probinsyano”—kung saan inalok pa siya ni FPJ ng tulong noong pumasok siya sa pulitika bilang pangalawang punong bayan—ibinahagi ni Fernando ang pinakamahalagang aral na tumatak sa kanyang isipan at puso.
“Alam mo, Daniel, ang paglilingkod, hindi ka lamang basta magaling, dapat may malasakit sa kapwa,” pagbabahagi ni Fernando.
Para sa gobernador, ang aral ay higit pa sa mundo ng pinilakang tabing at pulitika. Kinakatawan nito ang uri ng pamumuno na inuuna ang kapakanan ng mga tao, anuman ang kanilang katayuan sa lipunan.
“Kay FPJ, walang mahirap, walang mayaman, walang mababa at walang mataas,” dagdag niya. (UnliNews Online)
