ALINSUNOD sa direktiba ni Pangulong Bongbong Marcos, nakipagtulungan ang DepEd sa Department of Labor and Employment (DOLE) upang tuluyan nang maihatid sa lahat ng rehiyon ang Bagong Pilipinas Serbisyo Fair—isang inisyatibang naglalayong magbukas ng malinaw, mabilis, at konkretong career opportunities para sa ating mga senior high school graduates.
Sa kabila ng sabayang rollout ng Serbisyo Fair sa 42 paaralan sa buong bansa ngayong araw, personal tayong dumalo sa Batasan Hills National High School, kung saan tinanggap ang mga aplikanteng senior high school graduates mula sa Technical-Vocational-Livelihood (TVL) track at Alternative Learning System (ALS) mula sa iba’t ibang paaralan sa Quezon City.
Bukod dito, naghatid din ang programa ng libreng pagproseso ng mga dokumento para sa ating mga estudyante, alinsunod sa First Time Job Seekers Act na ating inakda noong tayo’y senador pa. Mayroon ding booth para sa mga nais mag-apply sa summer jobs sa ilalim ng Special Program for the Employment of Students (SPES)—isang batas na atin ding pinalawig mula 20 araw at ginawa hanggang 78 araw ang employment, upang mas makasuporta sa ating mga working students habang tinatapos ang kanilang pag-aaral.
Sa pamumuno ni PBBM, makaaasa ang ating mga mag-aaral at kanilang mga pamilya sa tuloy-tuloy na mga programang magtitiyak ng mas maliwanag na kinabukasan para sa bawat kabataang Pilipino. (UnliNews Online)
