LUNGSOD NG MALOLOS, Bulacan — Arestado ang isang lalaki na hinihinalang miyembro ng Akyat-Bahay gang matapos ang mabilis na aksyon ng mga operatiba ng Malolos City Police Station sa isinagawang hot pursuit operation nu’ng Martes (April 28).
Ayon kay P/Lt. Col. Rommel E. Geneblazo, Malolos chief of police, ang suspek ay isang tricycle driver, at residente ng Brgy. Caingin, Malolos City, Bulacan.
Batay sa paunang imbestigasyon, bandang alas-2:40 ng madaling araw, iligal na pumasok ang suspek sa inuupahang bahay ng biktimang si alyas “Cel”, 33 taong gulang, at tinangay ang halagang P40,000.
Nasaksihan umano ng anak ng biktima ang pangyayari matapos siyang magising at makita ang suspek na aktuwal na nagnanakaw sa loob ng kanilang tahanan.
Agad na iniulat ang insidente sa barangay at sa Malolos PNP, dahilan upang magsagawa ng agarang Hot pursuit operation ang mga pulis na nagresulta sa pagkakaaresto ng suspek sa Brgy. Catmon.
Narekober din ang tricycle na ginamit bilang getaway vehicle. Gayunman, hindi na narekober ang ninakaw na pera.
Ang suspek ay kasalukuyang nasa kustodiya ng Malolos CPS para sa kaukulang dokumentasyon at pagsasampa ng kaukulang kaso.
Patuloy ang paalala ng kapulisan sa publiko na maging mapagmatyag at agad ireport ang anumang kahina-hinalang aktibidad upang mapanatili ang kapayapaan at kaayusan sa komunidad. (UnliNews Online)
