LUNGSOD NG MALOLOS — Isusulong ang pagtatayo ng bagong Hall of Justice sa Bulacan matapos pormal na lumagda ang Korte Suprema at Pamahalaang Panlalawigan ng Bulacan sa isang usufruct agreement, na naglalayong mapalawak ang access sa hustisya at mapahusay ang paghahatid ng serbisyong hudisyal sa mga Bulakenyo.
Pinangunahan nina Acting Chief Justice Marvic Leonen, Gob. Daniel R. Fernando, at Bise Gob. Alexis C. Castro ang pagpirma sa usufruct agreement noong Biyernes, Oktubre 2, 2026 sa Supreme Court Diplomatic Lounge sa Lungsod ng Maynila.
Sa ilalim ng kasunduan, ipinagkakaloob ng Pamahalaang Panlalawigan sa Korte Suprema ang usufructuary rights sa isang itinalagang ari-arian ng lalawigan para sa pagtatayo ng makabagong judicial facilities na naglalayong maglaan ng karagdagang silid-hukuman upang suportahan ang mas episyenteng paghahatid ng hustisya sa Bulacan.
Inaasahan na ang pagtatayo ng bagong Hall of Justice ay makatutulong upang matugunan ang lumalaking demand sa mga trial court, magbigay ng mas angkop na lugar para sa mga paglilitis sa korte, at makatulong sa pagbabawas ng mga nakatambak na kaso tungo sa mas mabilis na paglitis ng mga ito.
Sumasalamin ang inisyatiba sa patuloy na koordinasyon sa pagitan ng Pamahalaang Panlalawigan at ng hudikatura sa pagpapalakas ng legal at hudisyal na imprastraktura sa Bulacan, lalo na sa pagdadala ng mga naa-access at mahusay na serbisyo ng hustisya na mas malapit sa mga komunidad.
Noong Pebrero 2025, nagkaroon din ng kasunduan ang Korte Suprema at Bulacan State University para sa isang hiwalay na proyekto ng Hall of Justice sa Lungsod ng Malolos. (UnliNews Online)
