STA. MARIA, Bulacan — Apat na miyembro ng isang pamilya kabilang ang dalawang menor de edad ang namatay matapos masunog ang tinitirhang bahay sa Barangay Caypombo sa nabanggit na bayan noong Martes ng madaling araw (Aug. 8).
Base sa pansamantalang ulat ng kapulisan, naganap ang sunog bandang 3:17 ng madaling araw kung saan nasunog ang unang palapag ng bahay na mabilis na umakyat sa ikalawang palapag kung saan naroroon ang mga biktima.
Kinilala ang mga biktima na sina Roy Lozano, 39 taong gulang; Marie Lozano Caparas, 39; Cedric Lozano, at Andre Lozano, 12; na pawang residente ng Block 9, lot 5, El Pueblo Del Rio, Barangay Caypombo, Sta. Maria.
Hindi na nagawang makaalis ng mga ito sa kanilang kinalalagyan na naging sanhi ng kanilang kamatayan..
Ang mga labi ng biktima ay isasailalim sa otopsiya ng Bulacan Provincial Forensic Unit, habang patuloy ang isinasagawang imbestigasyon ng Bureau of Fire Protection upang matukoy ang naing sanhi ng naturang sunog. (UnliNews Online)
