SANTA MARIA, Bulacan — Naabutan at nasamsam ng mga tauhan ng Santa Maria Municipal Police Station ang isang ilegal na pagawaan ng paputok sa Sitio Diliman Partida, Brgy. Pulong Buhangin, Santa Maria noong Biyernes (Oct. 31), bandang alas-5:00 ng hapon.
Ayon kay P/Lt. Col. Mark Louie M. Sigua, acting Chief of Police ng Santa Maria MPS, mabilis na rumesponde ang mga pulis matapos makatanggap ng report mula sa isang concerned citizen hinggil sa ilegal na paggawa ng paputok sa lugar. Sa ikinasang operasyon, naabutan ang suspek na si alyas “Raul,” 44 taong gulang at residente ng Brgy. Pulong Buhangin, habang abala sa paggawa ng mga “kwitis” nang walang kaukulang permit mula sa awtorisadong ahensya ng pamahalaan.
Narekober mula sa lugar ang kalahating kahon ng hindi pa tapos na mga kwitis at isang palangganang halos puno ng mga hindi pa tapos na kwitis, tinatayang nasa 1,500 piraso na nagkakahalaga ng humigit-kumulang ?5,500.00. Dinala sa himpilan ang suspek at ang mga ebidensya para sa wastong disposisyon, habang inihahanda ang kasong paglabag sa Republic Act 7183 o ang “Firecracker Law.”
Muling ipinapaalala ni Lt. Col. Sigua sa mga residente ng Santa Maria na mahigpit na ipinagbabawal ang paggawa at pagbebenta ng paputok nang walang permit. Hinikayat din niya ang patuloy na pakikipagtulungan ng publiko sa pag-uulat ng mga kahalintulad na ilegal na aktibidad upang mapanatiling ligtas, payapa, at maayos ang bayan ng Santa Maria. (UnliNews Online)
