CAMP ALEJO SANTOS, Bulacan — Arestado ang isang lalaki matapos tangkaing tumakas sa isinagawang Oplan Sita ng pulisya at makumpiskahan ng mga baril at bala sa City of San Jose Del Monte, Bulacan.
Ayon kay P/Lt. Col. Reyson M. Bagain, Chief of Police ng SJDM City Police Station, naganap ang insidente bandang alas-10ng gabi noong Sabado (Abril 4) sa Bijasa Road, Brgy. Gaya-Gaya, SJDM, Bulacan habang nagsasagawa ng Oplan Sita ang mga kapulisan.
Sa naturang operasyon, isang lalaking sakay ng isang motorsiklo ang pinahinto ng mga pulis para sa inspeksyon. Sa halip na huminto, bigla itong nag-U-turn at tinangkang tumakas na nagresulta sa maikling habulan. Kalaunan ay naharang at naaresto ang suspek na isang 38 taong gulang na residente ng Brgy. Gaya-Gaya, SJDM, Bulacan.
Napansin ng mga pulis ang isang caliber .45 Colt pistol na may serial number 573384 na nakasukbit sa kanyang baywang at may kargang 6 na live ammunition.
Sa isinagawang protective search, narekober pa ang isa pang Armscor caliber .45 pistol na may serial number 461997 at apat na magazine na may lamang 15 bala ng caliber .45 hollow-point ammunition. Nabigo ang suspek na magpakita ng anumang legal na dokumento para sa mga nasabing baril. Dahil dito, siya ay agad na inaresto.
Inihahanda na ang pagsasampa ng kasong Disobedience to an Agent of a Person in Authority at paglabag sa RA 10591 o Comprehensive Firearms and Ammunition Regulation Act laban sa suspek.
Pinagtibay ni P/Col. Jay b. Baybayan, Officer-In-Charge ng Bulacan Police Provincial Office, ang patuloy na pagpapatupad ng mga operasyon tulad ng OPLAN SITA upang mapigilan ang pagdadala ng ilegal na armas at matiyak ang kaligtasan ng publiko sa lalawigan ng Bulacan. Binigyang-diin niya na mananatiling mahigpit ang pagpapatupad ng batas laban sa mga lumalabag dito. (UnliNews Online)
