PANDI, Bulacan — Pinangunahan ni Mayor Enrico Roque ang pagkilos na maihatid ang agarang tulong at suporta sa mga Pandieño na nangangailangan at naging biktima ng pinalakas na habagat at mga Bagyong Luis at Maymay na nagdulot ng malawakang pagbaha sa buong lalawigan ng Bulacan.
Personal na nagtungo ang alkalde, kasama ang ilang miyembro ng Sangguniang Bayan, LDRRMO, MSWDO, mga kawani ng Pamahalaang Bayan sa mga barangay na lubhang naapektuhan ng kalamidad.
Maliban sa dalang mga food packs na magsisilbing pantawid-gutom ng mga kababayan, personal ding kinumusta ni Mayor Roque at mga konsehal ng bayan ang kalagayan ng mga ka-Pandieño, marinig ang kanilang mga pangangailangan, at masigurong hindi sila nag-iisa sa panahon ng matinding kalamidad.
Ayon kay Mayor Roque, ang pagbabayanihang tulad nito ay malaki ang maitutulong upang mabawasan ang kalungkutan ng kanilang mga kababayan.
Hangad ng alkalde, kasama ang Pamahalaang Bayang na ipakitang may gobyernong aalalay sa bawat Pandieño anumang pagsubok ang dumating sa kanilang buhay.
Nagpasalamat naman ang alkalde sa LDRRMO, MSWDO, mga kawani ng ating pamahalaang bayan, at sa lahat ng naging katuwang na walang pagod na nagsisilbi para sa kapakanan ng mga Pandieño.
Ayon kay Mayor Roque, “Sa bawat hamon na ating hinaharap, mas lalo nating nakikita ang lakas ng pagtutulungan, malasakit, at pagkakaisa ng bawat isa.”
Dagdag pa nito, “Patuloy po tayong kikilos at maglilingkod upang maipadama ang suporta at pag-aaruga na nararapat para sa ating mga ka-Pandieño.” (UnliNews Online)
