CAMP ALEJO SANTOS, Bulacan — Mabilis na naaresto ang isang lalaki na suspek sa pamamaril noong Sabado (Jan. 3) bandang ala-1 ng madaling araw sa harap ng isang gasoline station sa Cagayan Valley Road, Brgy. Tabang, Plaridel, Bulacan.
Agad namang ikinasawi ng isang 40-anyos na lalaking biktima at residente ng Brgy. Sto. Cristo, Malolos, Bulacan.
Ayon sa ulat ng Plaridel police sa pangunguna ni Lt. Col. Jerome Jay S. Ragonton, ang insidente ay nai-report bandang ala-2 ng madaling araw ng Enero 3, 2026.
Isang 24-anyos na delivery rider ang nakilalang saksi, habang ang suspek ay isang 30-anyos na lalaki at residente ng Brgy. San Pablo, Malolos, Bulacan.
Bilang agarang tugon, nagsagawa ng follow-up operation bandang ala-2:30 ng hapon ang Plaridel MPS, katuwang ang Provincial Intelligence Unit, Bulacan PPO, at ang Cabanatuan City Police Station, na nagresulta sa pagkakaaresto sa suspek bandang ala-5:30 ng hapon ng parehong araw, o wala pang 24 oras matapos ang insidente, sa isang hotel sa Maharlika Highway, Brgy. ACCFA, Cabanatuan City, Nueva Ecija.
Narekober mula sa suspek ang isang (1) Norinco caliber .45 pistol na may isang (1) magazine na may pitong (7) bala, at isang Mitsubishi L300 FB na ginamit umanong getaway vehicle.
Isasailalim ang suspek sa paraffin examination, habang ang baril ay ipapadala sa Bulacan Forensic Unit para sa ballistic examination. Inihanda ang kasong Murder para sa paghahain sa Office of the Provincial Prosecutor ng Bulacan. (UnliNews Online)
