CAMP ALEJO SANTOS, Bulacan — Dalawang hinihinalang tulak ng iligal na droga ang naaresto sa isinagawang buy-bust operation ng mga operatiba ng San Miguel Municipal Police Station (MPS) sa Brgy. Maligaya, San Miguel, Bulacan noong Martes (Mayo 26).
Ayon sa ulat ni P/Lt. Col. Mohammad Taufh S. Abduhalim, Hepe San Miguel MPS, kinilala ang mga naarestong suspek na sina alias “Jojo,” 49 anyos, residente ng Purok 3, Brgy. Maligaya, San Miguel, Bulacan at alias “Buleg,” 59 anyos, residente naman ng Purok 6 ng nasabing barangay. Ang dalawang suspek ay kapwa kabilang umano sa Street Level Individual (SLI) drug watchlist.
Bandang 4:50 ng hapon nang magsagawa ng anti-illegal drug operation ang mga operatiba ng Station Drug Enforcement Unit (SDEU) ng San Miguel MPS sa koordinasyon ng Philippine Drug Enforcement Agency (PDEA) na nagresulta sa pagkakaaresto ng mga suspek.
Nakumpiska sa operasyon ang 4 na heat-sealed plastic sachet na naglalaman ng hinihinalang shabu na may kabuuang timbang na humigit-kumulang 22 gramo at may standard drug price na nagkakahalaga ng P149,600. Narekober din ang isang pirasong marked money at isang itim na pouch na ginamit sa transaksyon.
Ang mga naarestong suspek at mga nakumpiskang ebidensya ay dinala sa San Miguel MPS para sa kaukulang dokumentasyon at disposisyon bago isailalim sa laboratory examination ng Bulacan Provincial Forensic Unit.
Inihahanda na rin ang pagsasampa ng kasong paglabag sa Sections 5, 11, at 26 ng Republic Act 9165 o Comprehensive Dangerous Drugs Act of 2002 laban sa mga suspek. (UnliNews Online)
