INILABAS ng PMPC Star Awards Inc. ang partial list of winners para sa parating na 17th Star Awards for Music.
Ang mga nanalo sa natitira pang mga kategorya ay iaanunsiyo sa mismong awards night na gaganapin sa Hunyo 25, 2026, Huwebes, sa Teatrino Greenhills, San Juan City.
Pasok sa listahan ng mga nanalo ang tinaguriang Nation’s Girl Group, ang BINI, na nagwagi sa Dance Recording of the Year para sa kanilang hit song na “Salamin Salamin.”
Kasama nilang nanalo sa parehong kategorya ang rising P-Pop boy group na Bilib para sa kanilang dance hit na “Say Whatcha Wanna Say.”
Kaabang-abang kung madadagdagan pa ang panalo ng BINI, na nominado rin sa mga kategoryang Song of the Year (“Salamin Salamin”), Album of the Year (Talaarawan), Duo/Group Artist of the Year, Music Video of the Year, at Pop Album of the Year.
Iuuwi naman ni Juan Karlos ang tropeyo para sa Male Acoustic Artist of the Year para sa awitin niyang “Tanga Mo Juan.”
Hihintayin pa ni JK sa awards night kung mananalo rin siya sa iba pang kategoryang nominado siya kabilang na ang Male Recording Artist of the Year, Concert of the Year, at Male Concert Performer.
Makulay naman ang panalo ni Unkabogable Superstar Vice Ganda sa Christmas Song of the Year para sa kanyang awiting “Rainbow Christmas.”
17TH STAR AWARDS FOR MUSIC HOSTS AND PERFORMERS
Samantala, excited ang young stars na sina Jayda Avanzado, Dylan Menor, Jarren Garcia, at Marthena Jickain dahil first time nilang magho-host ng Star Awards for Music.
Bukod sa pagho-host, magpe-perform din si Jarren kasama si Sam Concepcion sa opening number.
Pangungunahan nina Ima Castro, JV Decena, at Chad Borja ang tribute number para sa Pilita Corrales Lifetime Achievement Awardee na si Celeste Legaspi at Parangal Levi Celerio Lifetime Achievement Awardee na si Mon del Rosario. (UnliNews Online)
Photo: Courtesy of Daily Tribune
