LUNGSOD NG MALOLOS, Bulacan — Isang lalaking guro na dating barangay secretary ang binaril sa harap ng kanyang bahay sa Barangay Poblacion, sa Bayan ng Santa Maria noong Huwebes ng umaga (July 30).
Base sa police report, ang biktima, na kinilalang si Stephen Gelo Enriquez, 38-taong-gulang residente ng No. 10, 211st Century St., Ville, Brgy. Poblacion, Sta. Maria, Bulacan, ay nagtamo ng tama ng bala matapos siyang barilin ng isang hindi kilalang lalaking suspek na nakasuot ng puting bull cap bandang 12:30 ng madaling araw.
Ayon sa kapatid ng biktima na si Jam Enriquez Santo Domingo, nasa loob umano siya ng kanilang bahay nang makarinig siya ng putok ng baril na sinundan ng pagsigaw ng biktima para humingi ng tulong.
Paglabas niya, natagpuan niya ang biktima na duguan dahil sa tama ng bala. Agad na dinala ang biktima sa Bocaue Specialist Hospital ngunit namatay pagkatapos ng ilang oras na paggamot.
Ang biktima ay dating barangay secretary at kasalukuyang campaign manager ng isang kapitan ng barangay na tatakbo sa darating na Halalan sa Barangay at Sangguniang Kabataan (BSKE) 2026.
Mabilis na nagresponde sa pinangyarihan ng krimen ang mga operatiba ng Santa Maria police, nagsagawa ng beripikasyon, at nangolekta ng mga ebidensya.
Ang motibo sa likod ng pamamaril ay patuloy na iniimbestigahan at agad na naglunsad ng masinsinang manhunt operation ang Sta. Maria Municipal Police Station (MPS).
Hinihikayat naman si P/Lt. Col. Mark Louie M. Sigua, Hepe ng Santa Maria Police Station na ang sinumang nakasaksi sa insidente o may impormasyong makakatulong sa imbestigasyon na makipag-ugnayan sa pinakamalapit na istasyon ng pulisya. (UnliNews Online)
