LUBAO, Pampanga –May kabuuang 1,644 dialysis patients mula sa 2nd District ng Pampanga ang nakatanggap ng cash assistance mula sa Department of Social Welfare and Development (DSWD) para makatulong sa kanilang patuloy na gastusin sa gamutan.
Ipinamahagi ang financial assistance sa Lubao Gym, kasunod ng kahilingan ni Pampanga Governor Lilia “Nanay” Pineda sa DSWD na maglaan ng ayuda para sa mga kabalen na regular na sumasailalim sa dialysis.
Inaasahang makatutulong ang cash assistance sa mga gastusin ng mga benepisyaryo para sa dialysis treatment, gamot at iba pang kinakailangang serbisyong medikal.
Personal ding kinamusta ni Governor Pineda ang mga pasyente, kasama sina Lubao Mayor Esmie Pineda, Board Members Fritzie David-Dizon at Sajid Eusoof.
Patuloy ding nakikipag-ugnayan ang Kapitolyo sa mga national government agencies upang makahanap ng karagdagang pondo at suporta para sa iba pang pangangailangan ng mga dialysis patients.
Bawat benepisyaryo ay tumanggap ng P4,000 cash aid, kasama ang maintenance medicines gaya ng ketoanalogue, ayon sa kanilang pangangailangang medikal.
Patuloy ang pagtutulungan ng Kapitolyo at mga national government agencies upang maibsan ang gastusin sa gamutan ng ating mga kabalen. (UnliNews Online)
Source: Pampanga PIO
