CAMP ALEJO SANTOS, Bulacan — Apat na hinihinalang sangkot sa iligal na droga ang arestado matapos makumpiskahan ng hinihinalang shabu at isang kalibre .45 sa isang buy-bust operation ng Pandi pulis sa Barangay Mapulang Lupa, Pandi, Bulacan, bandang alas-6:30 ng gabi noong Oktubre 17, 2026.
Isinagawa ang operasyon ng mga operatiba ng Station Drug Enforcement Unit (SDEU) bilang bahagi ng pinaigting na kampanya ng pulisya laban sa iligal na droga at mga ipinagbabawal na armas.
Base sa ulat, kinilala ang mga suspek na 50, 40, 24 anyos na mga lalaki at isang 46 taong gulang na babae, pawang mga residente ng Brgy. Mapulang Lupa sa nabanggit na bayan.
Nasamsam sa operasyon ang anim na heat-sealed transparent plastic sachet na naglalaman ng hinihinalang shabu na may kabuuang timbang 7.47 gramo at tinatayang halaga na humigit-kumulang P50,796.00. Narekober din ang ginamit na buy-bust money, isang kalibre .45 na baril, isang magazine, at limang bala.
Dinala ang mga naaresto at nakumpiskang ebidensya sa Pandi MPS para sa dokumentasyon at kaukulang disposisyon, habang isusumite ang mga ito sa Bulacan Provincial Forensic Unit para sa pagsusuri sa droga, drug testing, at ballistic examination.
Nahaharap ang mga suspek sa mga kasong paglabag sa Sections 5, 11, at 26, Article II ng RA No. 9165 o Comprehensive Dangerous Drugs Act of 2002, at Republic Act No. 10591 o Comprehensive Firearms and Ammunition Regulation Act, alinsunod sa resulta ng imbestigasyon. (UnliNews Online)
