CAMP ALEJO SANTOS, Bulacan — Dalawang hinihinalang tulak ng iligal na droga ang nasakote sa inilatag na buy-bust operation ng Station Drug Enforcement Unit ng Malolos City Police Station sa Brgy. Panasahan, City of Malolos, Sabado ng madaling araw (Mayo 23).
Base sa ulat ni P/Lt. Col. Rommel E. Geneblazo, Hepe ng Malolos CPS, kinilala ang mga nadakip na suspek na sina Alyas Atan, 37 taong gulang, residente ng Fish Market, Brgy. Panasahan, Malolos City; at Alyas Sok, 52 taong gulang, residente ng Brgy. Perez, Bulakan, Bulacan.
Nakumpiska mula sa mga suspek ang 8 piraso ng heat-sealed transparent plastic sachets na naglalaman ng hinihinalang shabu na may tinatayang bigat na humigit-kumulang 81.50 gramo at may kaukulang halaga na humigit-kumulang na umaabot sa P554,200.00. Narekober din ang 1 piraso ng One Thousand Peso bill na ginamit bilang buy-bust money.
Bukod dito, nasamsam din sa operasyon ang isang caliber .38 revolver na walang trademark at serial number, kasama ang tatlong piraso ng live ammunition. Nabigo ang mga suspek na magpakita ng anumang legal na dokumento para sa pagmamay-ari ng naturang baril at mga bala.
Ang mga naarestong suspek at mga nakumpiskang ebidensya ay dinala sa Malolos City Police Station para sa kaukulang dokumentasyon at pagsasampa ng kasong paglabag sa Sections 5 at 11, Article II ng RA 9165 o Comprehensive Dangerous Drugs Act of 2002 at paglabag sa RA 10591 o Comprehensive Firearms and Ammunition Regulation Act. (UnliNews Online)
