LUNGSOD NG MALOLOS — Sa naganap na pamamaril ng isang estudyante sa isang eskwelahan sa Zamboanga City kamakailan, muling pinaigting ng Malolos PNP ang presensya ng mga pulis sa paaralan para sa ligtas na kapaligiran sa pag-aaral.
Sa ilalim ng direktiba ni P/Lt. Col. Jordan G. Santiago, acting Chief of Police, patuloy na pinalalakas ng Malolos City Police Station ang presensya ng kapulisan sa iba’t ibang paaralan sa lungsod bilang bahagi ng kampanya upang matiyak ang kaligtasan at seguridad ng mga mag-aaral, guro, at iba pang kawani ng paaralan.
Sa pamamagitan ng regular na police visibility, foot patrol, at school visitation, ang Malolos PNP ayon kay P/Lt. Col. Santiago, ay tinitiyak ang agarang pagtugon sa anumang insidente at nagbibigay ng kapanatagan sa mga magulang at sa buong komunidad.
Kasabay nito, patuloy ring nakikipag-ugnayan ang kapulisan sa mga administrador ng paaralan at iba pang stakeholders upang mapanatili ang isang ligtas, maayos, at mapayapang kapaligiran para sa pag-aaral.
“Bahagi rin ng programang ito ang pagpapaalala sa mga mag-aaral na maging mapagmatyag, sumunod sa mga alituntunin ng paaralan, at agad na iulat sa mga awtoridad ang anumang kahina-hinalang aktibidad o sitwasyon na maaaring magdulot ng panganib,” saad pa ni Col. Santiago.
Dagdag pa nito, “sa pamamagitan ng patuloy na presensya at pakikipagtulungan sa sektor ng edukasyon, muling pinagtitibay ng Malolos City Police Station ang kanilang adhikain na pangalagahan ang kapakanan ng kabataan at mapanatili ang kapayapaan at kaayusan sa bawat paaralan.” (UnliNews Online)
