PANDI, Bulacan — Namahagi ng mga metal detectors at two-way radios ang Pamahalaang Bayan ng Pandi sa mga principal ng mga pampubliko at pribadong paaralan sa pangunguna ni Mayor Enrico Roque bilang dagdag na seguridad sa mga paaralan o eskwelahan na sakop na nasabing bayan.
Ayon kay Mayor Roque, kapag kaligtasan ng ating mga kabataang Pandieño ang usapan, hindi po tayo puwedeng maging kampante. Naniniwala po ang inyong lingkod na malaking tulong ito para mas mapanatiling ligtas ang ating mga estudyante at buong komunidad ng paaralan.
Dagdag pa ng alkalde, layunin po ng pagpapaigting ng seguridad sa mga eskwelahan ay maiwasan ang pagpasok ng mga ipinagbabawal o mapanganib na kagamitan, mapalakas ang komunikasyon sa oras ng emergency, m apabilis ang koordinasyon at agarang pagtugon at mapanatiling ligtas ang bawat mag-aaral, guro, at kawani.
“Dalangin po nating hindi na kailangang gamitin ang mga kagamitang ito sa anumang hindi magandang pangyayari. Ngunit mas mabuti pong handa upang mas maprotektahan natin ang ating mga kabataan,” pagtatapos ni Mayor Roque. (UnliNews On line)
