UMUPO ako sa harapan ng aking laptop, upang makinig sa talumpati ng ating Pangulong Ferdinand Marcos Jr., na sa kanyang State of the Nation Address 2026 (SONA) ito ay hinggil sa Kalagayan ng Bansa. Puno ako ng pagkamangha, gulat, at malalim na kagalakan sa bawat salitang binibitawan ng Pangulo. Labis akong naantig sa pananaw na inilatag niya noong gabing iyon.
Matapos niyang ilahad ang napakaraming adhikain para sa Pilipinas at ang kanyang mga plano para sa ating kinabukasan, tinapos ng Pangulo ang kanyang talumpati sa pamamagitan ng pagtuon sa mga pagpapahalagang nagbubuklod sa atin bilang isang bayan at bilang bahagi ng Timog-Silangang Asya.
Binanggit niya kung paano pinatitibay ng diwa ng bayanihan ang buong rehiyon. Bilang tagapangulo ng ASEAN ngayong taon, pinagsama-sama nya ang ating mga kapitbahay upang mapagaan ang epekto ng hidwaan sa Gitnang Silangan—na nagpapatunay na ang pagkakaisa ng rehiyon ay nagbubunga ng tunay na pagbabago. Binigyang-diin niya na ang Asya ang ating ligtas na kanlungan, kung saan ang pagiging magkakalapit ay nagbubunga ng tunay na pagmamahalan.
Kasama ang mga kasaping bansa ng ASEAN, nagtatag tayo ika nya ng mga sistema upang pangalagaan at bigyang-lakas ang ating mga bansa: ang ASEAN+3 Emergency Rice Reserve ay magsisilbing pananggalang laban sa kakulangan sa pagkain, habang ang ASEAN Digital Economy Framework na pinangungunahan ng Pilipinas ay magbubukas ng mga pagkakataon para sa lokal na teknolohiya, mga makabagong serbisyong pinansyal, at maliliit na negosyo.
Pinagtibay na rin natin ang mga kasunduan para sa pinagsama-samang pag-iimbak ng enerhiya. Dahil ganap na magkakaugnay na ang ating mga linya ng kuryente sa Luzon, Visayas, at Mindanao, handa na tayong makilahok sa ASEAN Power Grid.
Labinlimang taon matapos itong lagdaan, pormal ng isinasakatuparan na ang kasunduang pangkapayapaan sa CBA-CPP-NPA. Sa BARMM, inihahanda na ang kauna-unahang regular na halalan sa parlyamento sa ilalim ng Komprehensibong Kasunduan sa Bangsamoro—isang patunay ng ating dedikasyon sa paghilom at pagkakaisa.
Sa ika-sampung anibersaryo ng Hatol ng 2016 sa ilalim ng UNCLOS, muling iginiit ng Pangulo na ang pinal at nagbubuklod na desisyong ito ay hindi maaaring labagin. Ipinagpugay niya ang Sandatahang Lakas, ang Tanodbaybayin, at ang mga mangingisdang nagsasakripisyo ng kanilang kaligtasan upang itaguyod ito.
“Kahit na magkakaiba tayo ng pananaw, iisa tayo—mga Pilipino sa diwa at sa dugo. Hindi tayo matitinag ng mga pang-iinsulto, at hindi rin tayo magpapasakop sa mga maniniil. Tatapusin natin ang ating gawain para sa ating mga anak at sa ating kinabukasan, sapagkat mahal natin ang ating bayan at ang ating mga kababayan,” pagwawakas ng Pangulo.
Tsk! Tsk! Tsk! Lubos kong sinusuportahan ang pananaw ng Pangulo hinggil sa mga kasalukuyang pangyayari sa Gitnang Silangan, sa Asya, at sa Pilipinas. Sa pamahalaan ng Pilipinas, sa sambayanang Pilipino, at sa Pangulo: Mabuhay! (UnliNews Online)
