PINABILIS ang mga hakbang laban sa paulit-ulit na pagbaha sa Bayan ng Hagonoy matapos inspeksiyunin nina Bulacan Governor Daniel R. Fernando at Department of Public Works and Highways (DPWH) Secretary Vivencio Dizon ang mga flood control operation sa Barangay Iba noong Lunes (Oktubre 12), kabilang ang dredging ng mga daluyan ng tubig at planong rehabilitasyon ng matagal nang nakatiwangwang na pumping station.
Kasama sina Hagonoy Mayor Ma. Rosario Sy-Alvarado-Mendoza at Barangay Captain Kim Robles, sinuri ng mga opisyal ang mga kasalukuyang operasyon at natukoy ang mga kailangang ayusin upang mapahusay ang depensa ng lugar laban sa pagbaha.
Kasunod ito ng pulong noong kamakailan kung saan tinalakay nina Fernando at Dizon ang mga agarang hakbang, panggitnaang solusyon at pangmatagalang estratehiya upang matugunan ang matagal nang problema sa pagbaha sa Bulacan.
Kabilang sa mga isinasagawang hakbang ang dredging sa mga ilog at sapa upang mapahusay ang daloy ng tubig at maiwasan ang pag-apaw. Plano ring buhayin ang lumang pumping station sa pamamagitan ng mas simple at murang disenyo upang makatipid at makabili ng karagdagang mga bomba.
Ayon kay Dizon, mahalagang mapanatiling malinis at maluwag ang mga estero at sapa upang hindi maipon ang tubig at magdulot ng pagbaha. Sa Barangay Iba, iniulat na maging bahagyang pag-ulan noon ay sapat na upang tumaas ang tubig sa sapa at bahain ang mga kalapit na komunidad.
Binigyang-diin din niya ang potensiyal ng mga mobile pump bilang praktikal at epektibong solusyon sa mga lugar na madalas bahain.
Pinag-aaralan din ang pagpapalawak ng mga katulad na hakbang sa iba pang barangay, kabilang ang paggamit ng mga makakalikasang solusyon gaya ng mga pilapil na yari sa lupa at mga harang na kawayan upang maprotektahan ang mga komunidad na lantad sa pagbaha.
Nagpasalamat naman si Fernando sa DPWH sa pagtugon sa mga hindi natapos na flood control project sa Hagonoy, kabilang ang pagsasara sa mga natitirang puwang sa mga proteksiyon sa baha at pagpapatupad ng karagdagang proyekto para mapahusay ang drainage at pamamahala sa tubig.
Tiniyak din ng gobernador ang patuloy na suporta ng Pamahalaang Panlalawigan, kabilang ang planong pagbili ng mobile pump, habang isinusulong ang pagtutulungan ng pambansa at lokal na pamahalaan upang mabawasan ang epekto ng pagbaha sa mga Bulakenyo. (UnliNews Online)
Photos: DPWH
