PANDI, Bulacan — Umangat sa Top 2 ang Bayan ng Pandi sa Municipal Category ng Manila BAYani Awards and Incentives (MBAI) 2026, isang pagkilalang iginawad sa ilalim ng PAGMAYA 2026 ng DILG Region III para sa mga inisyatiba ng lokal na pamahalaan sa pangangalaga ng kalikasan.
Tinanggap ng Pandi Mayor Enrico Roque ang pagkilala bilang patunay sa patuloy nitong pagsusulong ng mga programang pangkalikasan at responsableng pamamahala, habang binigyang-diin na ang parangal ay nagsisilbing dagdag na inspirasyon upang higit pang mapabuti ang serbisyo at pangangalaga sa komunidad.
“Higit sa isang parangal ang pagkilala, dahil nagsisilbi rin itong hamon sa mga opisyal at mamamayan ng Pandi na ipagpatuloy ang mga hakbang para sa pangangalaga ng kapaligiran at pagpapanatili ng malinis at maayos na komunidad,” dagdag pa ng alkalde.
Nagpaabot naman ng pasasalamat ang lokal na pamahalaan sa mga Pandieño na patuloy na nakikiisa sa mga programang pangkalikasan, iginiit na ang anumang tagumpay ng bayan ay bunga ng sama-samang pagkilos ng pamahalaan at komunidad. (UnliNews Online)
